Tag Archives: ஜோதிடர் கடிவேலு

சனிப் பெயர்ச்சி 2014 – ஒரு அலசல்

11 அக்

அனுபவமிக்க ஜோதிட ஆசிரியரின் அலசல் பார்வை

வருகின்ற நவம்பர் மாதம் (2014) 2 ம் நாள் திருக்கணித பஞ்சாங்கப் படியும், டிசம்பர் 16 ம் நாள் வாக்கியப் பஞ்சங்கப்படியும் சனி துலா ராசியை விட்டு விருச்சிக ராசிக்கு இடம் பெயர்கிறார். இந்த இடப் பெயற்சியை அனைவரும் மிகவும் ஆவலுடனும் சிலர்  கலக்கத்துடனும் எதிர்பார்த்துக் கொண்டிருக்கின்றனர். ஜோதிடப் பத்திரிகைகளில் இது பற்றி எழுத ஆரம்பித்து விட்டனர். நாமும் இதுபற்றி ஆராய்ந்தால் என்ன?

சனி துன்பத்தையும் துக்கத்தையும் ஆள்பவர். நமது முந்தைய கர்மாவை ஆள்பவர். தடைகளுக்கு காரணமானவர். நேரம் காலம் பார்க்காமல் கடுமையாக உழைப்பது, பணி புரிவது, அடுத்தவருக்கு சேவை செய்வது, வேலைக்காரர்கள், ஜனநாயகம், ஏழ்மை, வியாதி, குற்றம், மேற்கு திசை, கற்கள், எண்ணை, இருட்டு, சோஹம், ஏமாற்றம் போன்ற நமக்கு விருப்பமில்லாத விஷயங்களை அவர் ஆள்கிறார். நமது அஹங்காரத்தை ஆள்பவர். நமது மனோகாரகனான சந்திரனுடன் இந்த ராசிப் பெயர்ச்சியினால் அவருக்கு ஏற்படும் உறவு நமது மனதைப் பாதித்து அதன் மூலம் சில விளைவுகளுக்கு காரணமாக அமைகின்றது. சூரியனிலிருந்து வெகு தொலைவில் உள்ள சனி மிகவும் மெதுவாக நகருவதால் இவருக்கு மந்தன் என்றும் ஒரு பெயர் உண்டு. சூரியனைச் சுற்ற இவர் 30 ஆண்டுகள் எடுத்துக் கொள்கிறார். அதனால் ஒரு ராசியில் இவர் 2½  ஆண்டுகள் எடுத்துக் கொள்கிறார்.

சென்ற 2½ ஆண்டுகலாக இவர், தான் உச்சம் பெறும் ராசியான துலாத்தில் இருந்து சாதாரண மனிதர்களுக்கும், உழைக்கும் வர்க்கத்துக்கும் நல்லது செய்து வந்தார். ராகுவும் அவரோடு சேர்ந்ததால் சாதாரண மனிதர்களின் கட்சியான ஆம் ஆத்மி கட்சி எழுச்சி கண்டது. ராகு அரசியலையும் எதிராளியை மிரட்டுபவரையும் குறிக்கிறார். நாட்டில் குற்றம் புரிபவர்கள், வக்கிர குணத்தினால் மஹாபாதகத் தவறுகளைச் செய்பவர்களுக்கு தூண்டுகோலாக இந்த ராகு சனி செவ்வாய் தொடர்பு துணையாக இருந்தது. நல்ல வேளை ராகு துலாத்திலிருந்து கன்னிக்கு நகர்ந்தார்.

சனியின் உச்ச நிலை மக்கள் உரிமைக்கு போராடி அதில் வெற்றி காணும் நிலையைத் தந்தது. அதே சமயம் சில மோசமான நிகழ்வுகளும் இயற்கை கொந்தளிப்பின் மூலமாகவும், மனித தவறுகளின் மூலமாகவும் இந்த கால கட்டத்தில் நடந்தன. சனி, ராகு, செவ்வாய் சேர்க்கை கோர நடனம் ஆடும்.

எல்லோருடைய வாழ்க்கையிலும் அவரவரது ஜாதகத்தில் ஏதோ ஒரு ராசியில் சனி அமர்ந்துள்ளார். சிலருக்கு அவர் யோககாரகராக அமர்ந்து நல்ல பலன்களையும் அளிக்கத்தவறவில்லை. அவர் உச்ச நிலையில் சந்தோஷமாக அமர்ந்ததால் சிலர் நன்மை அடைந்துள்ளனர். உதாரணமாக துலா லக்னம் அல்லது ரிஷப லக்னம் உள்ள ஜாதகருக்கு சந்திரன் தனுசு, ரிஷபம் அல்லது சிம்மத்தில் ( அதாவது சந்திரனுக்கு சனி 3, 6, 11 ல்) இருந்திருந்தால் சென்ற 2½ வருடங்களில் சனி அவர்க்கு நிறைய நல்லது செய்திருப்பார்.

இப்பொழுது சனி தன் உச்ச வீட்டிலிருந்து தன் பரம எதிரியான செவ்வாயின் வீடான விருச்சிகத்துக்கு நகர்கிறார். சனி முதுமை, மந்தம், நீண்ட நாட்கள் ஓரிடத்தில் தங்குவது போன்ற குணங்களை உடையவர். இவர் போய் அமரும் வீடான விருச்சிகத்தின் அதிபர் செவ்வாய் இளமை, சக்தியின் வடிவம், வேகம், போராடும் குணம், சுறுசுறுப்பு போன்ற குணங்களை உடையவர். விருச்சிகத்தை செவ்வாயுடன் சேர்ந்து ஆளும் கேதுவும் சனியோடு போராடுபவர். சனி நான் என்கிற நிலையை ஆள்பவர். கேது நான் என்கிற நிலையை அழிப்பவர். ஞானகாரகன். அதனால் அவரும் சனியின் விரோதிதான்.

துலாம் கால புருஷனின் 7 ம் பாவம். சனி அங்கிருந்து ரகசியத்தையும், மாற்றத்தையும் அடையாளம் காட்டும் 8 ம் பாவத்துக்கு நகர்கிறார். அந்த ராசியின் அடையாளம் கொடிய தேள். விஷத்தன்மை வாய்ந்தது. சனியின் ஆளுமைக்கு உட்பட்ட ஜாதகர்கள் இந்த விஷத்தன்மையை நன்கு உணரவேண்டிவரும். தங்களுக்கு இப்பிறவியில் [ இறைவனால் ] கிடைத்த சுதந்திரத்தை தவறாகப் பயன் படுத்தியவர்கள் உப்பு தின்றவன் தண்ணீர் குடித்தேயாக வேண்டும் என்பதை உணருவார்கள்.

நீண்ட நாட்கள் வியாதியால் துன்பப்பட்டுக் கொண்டிருப்பவர்கள் இன்னும் அதிகளவு துன்பப்படும் நிலை நீங்கவில்லை. உழைப்பாளிகள் போராடவேண்டிய கால கட்டம் இது. சனி விரோதியின் வீட்டில் அதுவும் கால புருஷனின் 8 ம் வீட்டில்; இழப்பு, கெட்ட பெயர், அவமானம், மாற்றம் ஆகிய அனைத்தையும் கொண்டு வருவார்.

சனியும் கர்மாவோடு தொடர்புள்ளவர். அவர் சென்று அமரும் விருச்சிகமும் கால புருஷனின் 8 ம் வீடு என்பதால் கர்மாவோடு தொடர்புள்ளது. ஒவ்வொருவருக்கும் இந்த சனிப் பெய்ற்சியினால் கிடைக்கும் நல்ல அல்லது கெட்ட பலங்கள் அனைத்தும் கர்ம பலன்களாகவே அமையும் என்று எனக்குத் தோன்றுகிறது.

சந்திரன் நமது மனோகாரகன். ஒவ்வொருவரது மனதையும் ஆள்பவன். நமது அம்மாவைக் குறிப்பவன், வீட்டை ஆள்வது அம்மாதானே. ஒவ்வொருவரின் சமுதாய அச்சு சந்திரன். ஒவ்வொருவருக்கும் மனம் என்பது புதர்கள் மண்டிக்கிடக்கும் ஒரு புரியாத பகுதி. அது தர்ப்பையா கோரைப்புல்லா என்று எலோராலும் புரிந்து கொள்ளமுடியாது. உள்ளே விஷ ஜந்துக்களும் இருக்கலாம், வாசமுள்ள தாழம்பூவும் இருக்கலாம். சூரியன் அரசன் என்றால் சந்திரன் அரசி. ஒவ்வொரு கிரகமும் வலுவுடனோ அல்லது வலுவிழந்தோ நிற்கும் காலங்களில் அதிகமாக பாதிக்கப்படுவது சந்திரன்தான். நீண்ட நேரம் ஒரு வேலை செய்து பாருங்கள். உடல் சோர்வைவிட மனச் சோர்வுதான் அதிகம் உணரப்படும். வேலையே செய்யாமல் நீண்ட நேரம் ஓய்வு எடுத்துப் பாருங்கள். அப்பொழுதும் மனம்தான் சோர்வடையும்.

மேலே சொன்ன விஷயங்கள் ஏன் கிரக இடப் பெயற்சியை சந்திரனுடன் ஒப்பிடுகிறோம் என்பதைப் புரிந்து கொள்ளவே.

புனரபி ஜனனம் புனரபி மரணம் என்பதை அடையாளம் காட்டும் கர்மாவைக் குறிக்கும் கிரகம் சனி. இவருடைய நிலையினால் ஒவ்வொரு ராசிக்கும் ஏற்படப்போகும் பலன் தான் என்ன?

விருச்சிகம்

இங்கு சந்திரன் பலமிழந்து நிற்கிறான். இது ரகசியமான ராசி. சந்திரனும் சனியும் சேரும்போது அது புனர்பு தோஷத்தை அடையாளம் காட்டுகிறது. சனி தனது பகை வீட்டில். சந்திரன் நீச நிலையில். ஏழரைச் சனியின் நர்த்தனம் நடு வீட்டில். 21/2வருஷம் கடந்து விட்டது. 2½ வருஷம் பாக்கி. அதனால் நடு வீடு. மனதை, மனதில் ஏற்படும் உணர்வுகளை பாதிக்கும் நிலை. கர்மஸ்தானத்தில். பழைய கர்மா தன் வினைப் பயனை தயங்காமல் தரும் நிலை. இது சற்றே கடினமான நிலைதான். மன அழுத்தம், துக்கம், சோகம், தவறான முடிவுகள் எடுப்பது போன்ற பிரச்சனைகளால் இந்த ராசியில் பிறந்தவர்கள் துன்பப்படுவர். முடிவெடுப்பதில் யார் முன்னிலை? வலுவிழந்த சந்திரன். சனியோ பகை வீட்டில். இங்கு அவரையும் அறியாமலே அவரது முன்வினை செயல் படும். அது நிச்சயம் மனதைப் பாதிக்கும். அது [ ஒருவரது தவறான முடிவு ]அவரை மட்டுமின்றி அவர் சார்ந்த சமுதாயத்தையும் பாதிக்கும். ஏற்றுக்கொள்ளும் பொறுப்புகளில் தவறுகள் நடக்க வாய்ப்பு இருக்கிறது. பெயர் கெடும். விபத்துகள் ஏற்படலாம்.

என்னடா இந்த மனிதர்? இவருக்கு விருச்சிகத்தின் மீது என்ன கோபம்? நல்லதாகவே ஒன்னும் இல்லையா? என்றெல்லாம் ஆராயத் தோன்றுகிறதா? கவலை வேண்டாம். ராகு உதவிக்கு வருவார். அவர் விருச்சிகத்திலிருந்து 3 ம் வீட்டில் இருக்கிறார். சுமார் 1 ¼ வருஷம் அவர் உதவுவார் (3, 6, 11 ல்). ஆனால் கேது தொல்லை கொடுப்பார். அவர் 9* ம் வீட்டில். போச்சுடா ! குரு அடுத்த ஜூலை வரை உதவுவார். ஒரேயடியாக பயப்பட வேண்டாம். குருவின் கிரக த்ரிஷ்டி மற்றும் ராசி த்ரிஷ்டி இருக்கிறது. எப்படி? குரு ஒருங்கிணைக்கும் கிரகம். அறிவைக் கொடுப்பவன். அவனது பார்வை எது சரி, எது தவறு என்பதை பிரித்துப் பார்க்க உதவும். எந்த முடிவையும் எடுக்கும் முன் உங்களது நலம் நாடும் உங்கள் குரு அல்லது உங்கள் குடும்பத்தில் உள்ள பெரியவர் ஆகியவர்களின் ஆலோசனைக் கேட்டுப் பெறுங்கள். கேட்க வேண்டும் என்கிற எண்னம் எப்படி ஏற்படும். மந்திர சக்தியின் அருளினால்.

விருச்சிகம் லக்னம் என்றால், நீர் தத்துவ ராசியில், நீர் கிரகமான சந்திரனும், வாயு கிரகமான சனியும் இருப்பது பஞ்சபூத தத்துவங்களுக்கிடையே ஒற்றுமை இல்லாத நிலையை ஏற்படுத்துகிறது. இது ரகசிய ராசி என்பதால் அங்கு லக்னம் அமைந்துள்ளதால் ( ஆருத லக்னமும் இருக்கலாம் ) உடல் நலம் பாதிபடையும். உங்களது வாழ்க்கை முறையை அது சரியாக இருக்கிரதா என்று ஒருமுறை ஆராய்ந்து பார்த்து விடுங்கள். அது ரகசிய ராசி. நீரும் காற்றும் சேரும்போது தடம் மாறலாம், புயல் வீசலாம், மரம் செடி கொடிகள் அழியலாம். குரு பார்க்கிறார். பகுத்தறியும் நிலையை ஏற்படுத்துவார். பயப்பட வேண்டாம். ஆனாலும் நாம் எங்கிருக்கிறோம் என்பது நமக்கு தெரிய வேண்டும் அல்லவா?

 

என்ன செய்ய வேண்டும்?

“ஓம் நமோ பகவதே வாசுதேவாய :” இந்த மந்திரத்தை தினமும் 108 தடவை சொல்லுங்கள். ஹனுமான் சாலிஸா தினதோரும் படியுங்கள். இறைவனை மனதால் கெட்டியாக பிடித்துக் கொள்ளுங்கள். ஏழைகளுக்கு தவறாமல் உதவுங்கள். காக்கைக்கு அன்னம் வைத்துப் பழகுங்கள்.

கீழே கொடுத்துள்ள சனியின் பீஜ மந்திரத்தை ஜபம் செய்யுங்கள்.

शम् शनिस्चराय नम: ஸம் ஸனைஸ்சராய நம:

சிலருக்கு விருச்சிகமே லக்னமாகவும், அதுவே ராசியாகவும் அமையலாம். அவர்கள் கீழே கொடுத்துள்ள அஷ்ட பைரவ மந்திரங்களையும் தினமும் பாராயணம் செய்யுங்கள்.

ஓம் அஸிதங்க பைரவாய நம:

ஓம் ரூரூ பைரவாய நம:

ஓம் சண்ட பைரவாய நம:

ஓம் க்ரோத பைரவாய நம:

ஓம் உன்மத்த பைரவாய நம:

ஓம் கால பைரவாய நம:

ஓம் பீஷண பைரவாய நம:

ஓம் ஸம்ஹார பைரவாய நம:

பைரவர் லக்னத்தைக் காப்பவர். தேய்பிறை அஷ்டமியும் புதன்கிழமையும் சேரும் காலத்தில் பைரவரை தேங்காய் தீபம் ஏற்றி [ பசு நெய்யினால் ] வழிபடுங்கள்.

 

இந்த வழிபாடுகள் நிச்சயம் உங்களைக் காப்பாற்றும். தயவு செய்து எள் முடிச்சு விளக்கு மட்டும் ஏற்றாதீர்கள். நல்லெண்ணை தீபம் ஏற்றுங்கள்.

நன்றி: திரு. S. நாராயணன், சப்தரிஷி ஜோதிட கல்வி மற்றும் ஆராய்ச்சி மையம்

குறிப்பு: நமது ஜோதிடர் கடிவேலுவிடமிருந்து நமக்கு வந்த தகவலை இங்கே கொடுத்திருக்கிறேன். இது சம்பந்தமாக மற்ற ராசிகளுக்கும் தகவல் கிடைத்தால் இங்கே பகிர்ந்து கொள்வேன்.
* 8 என்று இருந்தது 9 என்று திருத்தப்பட்டுள்ளது.
Advertisements

கவிஞர் கடிவேலு சோதிடரான கதை – பகுதி 4

26 டிசம்பர்

சென்ற சில இடுகைகளாக தான் சோதிடரானது எப்படி என்று கவிஞர் கடிவேலு சொல்லி வருகிறாரல்லவா? இதோ அவரே தொடர்கிறார். முந்தைய இடுகைகளைப் படிக்க இங்கே சொடுக்கவும்.

கவிஞர் கடிவேலு சோதிடரான கதை – பகுதி 2

கவிஞர் கடிவேலு சோதிடரான கதை – பகுதி 3

ஆவலோடு நான் எதிபார்த்துக் காத்திருந்த அந்த சனிக்கிழமையும் வந்தது. அன்று பிரதோஷ நாள் அல்லவா? அந்தப் பெரியவரைச் சந்திக்கும் நாள் என்பதால் காலை சீக்கிரமே குளித்து ரெடியாகி விட்டேன். நண்பருக்கு போன் போட்டு காலை பத்து மணிக்கு வருவதாக தகவல் சொல்லி விட்டேன்.

நான் அங்கு சென்றபோது நண்பர் நம்மை வாசலில் வந்து வரவேற்று அழைத்துச் சென்றார்.

“அப்பா எங்கே இருக்கிறார்?” என்று கேட்டேன்.

“ஹாலில்தான் இருக்கிறார். இன்று முழுவதும் உபவாசம் இருப்பார். புத்தகங்களைப் படித்துக் கொண்டு சிவ சிந்தனையிலேயே இருப்பார்” என்றார்.

உள்ளே சென்ற போது, அந்தப் பெரியவர் ஹாலில் ஒரு சாய்வு நாற்காலியில் சாய்ந்து அமர்ந்திருந்தார். கண்கள் மூடி இருந்தது. நான் மெதுவாக அருகில் சென்று, “ஐயா, வணக்கம்” என்றேன். அதைக் கேட்டு அவர் கண்களைத் திறந்து பார்த்தார்.

“என்னை ஆசீர்வாதம் செய்யுங்கள்” என்று அவர் கால்களைத் தொட்டு வணங்கினேன்.

“நல்லா இருப்பா” என்று சொன்னவர், “நீ, அன்னிக்கு வந்தவன்தானே? விசாக நட்சத்திரம்” என்றார்.

“ஆமாம் ஐயா, அது நான்தான்” என்றேன். உடனே பக்கத்தில் இருந்த ஒரு இருக்கையைக் காட்டி, “இப்படி உட்கார்” என்றார். அவர் காட்டிய இடத்தில் உட்கார்ந்தேன். என்னைக் கொஞ்ச நேரம் உற்றுப் பார்த்தார்.

“என்னிடம் ஏதோ கேட்க வந்திருக்கிறாய் போலத் தெரிகிறது. சரிதானே?” என்றார்.

“ஆமாம் ஐயா, அதற்குத்தான் வந்திருக்கிறேன்” என்றேன்.

“சொல்லு, என்ன விஷயம்?” என்றார்.

“நான் விசாரித்த வரையில், ஒருவருடைய ராசி, நட்சத்திரம் போன்றவற்றைத் தெரிந்து கொள்ள வேண்டும் என்றால், அவர் பிறந்த நேரம், இடம் இவற்றை வைத்து கணித்துத்தான் தெரிந்து கொள்ள முடியும் என்று புரிந்து கொண்டேன்” என்றேன்.

“அது சரிதான். அது தெரிந்தால்தான் ஒரு சில கணக்குகளைப் போட்டு கண்டு பிடிக்கலாம். இப்போதெல்லாம் அதெற்கென்று நிறைய சாஃப்ட்வேர்கள் வந்து விட்டதால் அது ஒன்றும் கஷ்டமான காரியமில்லை” என்றார்.

“ஆனால், என்னுடைய பிறந்த நேரமோ, ஊரோ உங்களுக்குத் தெரிய வாய்ப்பில்லை. அப்புறம் எப்படி என்னுடைய ராசி, லக்னமெல்லாம் உங்களால் சொல்ல முடிந்தது?” என்றேன். அவர் கண்களை மூடி கொஞ்ச நேரம் மௌனமாக இருந்தார். நேரம் ஓடிக்கொண்டிருந்தது.

சிறிது நேரம் கழித்து கண்களைத் திறந்தவர், “என்ன கேட்டே?” என்றார். என்ன இது! இப்படிக் கேட்கிறார். ஒருவேளை இதுவரை நடந்ததை எல்லாம் மறந்து விட்டாரோ என்று நினைக்கத் தோன்றியது. சரி! வயதாகி விட்டாலே மறதி வருவது சகஜம்தானே என்று எனக்கு நானே சமாதானம் செய்து கொண்டேன்.

ஆனால் நான் அப்படி நினைத்தது தவறு என்று கொஞ்ச நேரத்தில் எனக்குப் புரிந்தது.

“நான் சென்ற முறை வந்திருந்த போது, என்னைப் பார்த்தவுடன் நான் துலா ராசி என்றும், மிதுன லக்னம் என்றும் சொன்னீர்களே, அது எப்படி என்று…”என்றவனை இடைமறித்து,

“அது மட்டுமா சொன்னேன். நீ விசாக நட்சத்திரம் 1ம் பாதம் என்றுகூடச் சொன்னேனே” என்றார். அதைக் கேட்ட எனக்கு அதிர்ச்சியே ஏற்பட்டு விட்டது. இவ்வளவு ஞாபக சக்தி உள்ளவர் எதற்காக நம்மிடம் ‘என்ன கேட்டாய்’ என்று மறுபடி சொல்லச் சொன்னார்? புரியவில்லை.

“நீங்கள் சொல்வது சரிதான், அதுதான் எப்படி என்று கேட்டேன்” என்றேன்.

“உன்னைப் பார்த்து தானே சொன்னேன்?” என்றார் என்னை நேராகப் பார்த்து.

“ஆமாம். என்னைப் பார்த்து தான் சொன்னீர்கள்” என்றேன்.

எதற்காக இப்படிக் கேட்கிறார் என்று புரியவில்லை. தொடர்ந்து அவரே,

“பிறகு என்ன சந்தேகம்?” என்றார்.

ஏன் இப்படிப் போட்டு குழப்புகிறார். எப்படி சொன்னீர்கள் என்று விளக்கம் கேட்டால் அதற்கு பதில் சொல்லாமல் மழுப்புகிறாரே!

“ஐயா, அதில்தான் சந்தேகம். என்னைப் பார்த்தே எப்படி அதையெல்லாம் சொன்னீர்கள்?” என்றேன் பவ்யமாக.

“ஒரு விரல் நகத்தை வைத்துக் கொண்டு, அந்த நகத்துக்குரிய நபரையே சிலையாக வடித்த சிற்பியைப் பற்றிக் கேள்விப்பட்டதில்லையா? ஒரு தலை முடியை வைத்து அதற்குச் சொந்தமான பெண்ணை மச்சம் முதற்கொண்டு மிகச் சரியாக ஓவியமாகத் தீட்டிய ஓவியனைப் பற்றி நீ கேள்விப் பட்டதில்லையா?” என்றார்.

“ஆம் ஐயா, நான் கேள்விப் பட்டிருக்கிறேன். சாமுத்திரிகா லட்சணத்தை வைத்து அப்படிச் செய்ய முடியும் என்று என்னுடைய சிறு வயதில் கேட்ட கதைகளில் சொல்லக் கேள்விப் பட்டிருக்கிறேன். என் தந்தையார் கூட இது போன்ற கதைகள் நிறையச் சொல்லி இருக்கிறார்” என்றேன்.

“ஏம்ப்பா, ஒரு நகத்தையோ, ஒரு தலைமுடியையோ வைத்து முழு உருவத்தையும் சிலையாகவோ, ஓவியமாகவோ வடிக்க முடியும் போது, உன்னை நேருக்கு நேர் பார்த்து உன்னைப் பற்றிய விபரங்களை என்னால் சொல்ல முடியாதா?” என்றார்.

எனக்கு நெற்றிப் பொட்டில் அடித்தால் போல் உறைத்தது. அப்படியானால் இவர் சாதாரணமான மனிதர் அல்ல. சாமுத்திரிகா லட்சணம் அறிந்த அறிஞர்.

அப்படியே அவர் முன் சாஷ்டாங்கமாக விழுந்து நமஸ்கரித்தேன்.

“ஐயா, தவறாக நான் எதுவும் கேட்டு இருந்தால் மன்னிக்கவும்” என்றேன்.

“எழுந்திருப்பா, உன்மேல் தவறில்லை. இப்போது கலிகாலம், எதற்கெடுத்தாலும் சந்தேகம். நீ என்ன செய்வாய்?” என்றார்.

“ஐயா, ஒரு வேண்டுகோள். அருள்கூர்ந்து என்னை தங்களுடைய சிஷ்யனாக ஏற்றுக் கொள்ள வேண்டும்” என்றேன்.

“சிஷ்யனா? எதற்கு?” என்றார் எதற்கும் பிடி கொடுக்காமல்.

“இந்த சாமுத்திரிகா லட்சணத்தை எனக்கு தாங்கள் உபதேசிக்க வேண்டும்” என்றேன்.

“அப்பா, எனக்கோ வயதாகி விட்டது. என்னால் அது முடியுமா என்று தோன்றவில்லை. அந்தக் கலையை நன்றாக அறிந்தவர்களும் மிக மிக சொற்பம். அதனால் உன்னுடைய எண்னம் நிறைவேறுவது மிகவும் கடினம்” என்றார்.

“ஐயா, நீங்கள் அப்படிச் சொல்லக்கூடாது. உங்களுக்கு எப்பொழுது வசதிப்படுமோ அப்போதெல்லாம் நான் வருகிறேன். வந்து கற்றுக் கொள்கிறேன்” என்றேன்.

“அப்படியெல்லாம் திடீரென ஆரம்பித்து விட முடியாது. நீ முதலில் ஜோதிட சாஸ்திரத்தில் நிபுணத்துவம் பெற வேண்டும். அதன் பிறகுதான் இதற்கு வர வேண்டும்” என்றார்.

“அப்படியானால் ஜோதிட சாஸ்திரத்தை முதலில் கற்றுக் கொடுக்க வேண்டுகிறேன். அருள்கூர்ந்து என்னை சிஷ்யனாக ஏற்றுக் கொள்ளுங்கள்” என்றேன்.

கொஞ்ச நேரம் யோசித்தார். அவர் முன்னால் கைகட்டி நின்று காத்துக் கொண்டிருந்தேன்.

“என்னுடைய சிஷ்யன் சேகரைப் போய் பார். அவன் உனக்கு உதவுவான்” என்றார். ஒரு போன் நம்பரையும், அட்ரஸையும் குறித்துக் கொடுத்தார்.

“ஐயா, நீங்கள் சொன்னபடியே செய்கிறேன்” என்றேன்.

“முதலில் ஜோதிட சாஸ்திரத்தைக் கற்று தெளிவு பெறு. பிறகு இதைப் பற்றி யோசிக்கலாம். ஒருவேளை என்னுடைய காலம் முடிந்து விட்டாலும் உனக்குத் தகுந்த குருநாதர் உன்னைத் தேடி வருவார்” என்று சொல்லி என்னை ஆசீர்வதித்தார்.

அவரை வணங்கி விடை பெற்று அங்கிருந்து கிளம்பினேன்.

இவ்வாறு தன்னுடைய கதையை முடித்தார் ஜோதிடர் கடிவேலு.

கவிஞர் கடிவேலு சோதிடரான கதை – பகுதி 3

18 டிசம்பர்

சென்ற இடுகையில் தான் சோதிடரானது எப்படி என்ற கவிஞர் கடிவேலு சொல்லி வந்தாரல்லவா? இதோ அவரே தொடர்ந்து அந்தக் கதையைச் சொல்கிறார். கேட்போம். முந்தைய இடுகையைப் படிக்க இங்கே சொடுக்கவும்.

யாரிடமாவது கேட்டு ஏதாவது விளக்கம் கிடைக்குமா என்று தேட ஆரம்பித்தேன். அப்போது பக்கத்து வீட்டில் இருப்பவர் ஜோதிடத்தில் ஓரளவு பரிச்சயமுள்ளவர் என்று தெரிந்தது. இவ்வளவு நாள் பக்கத்து வீட்டில் இருந்தாலும் நமக்குத் தேவை என்று வரும் போதுதான் அவரிடம் என்ன தனித்துவம் இருக்கிறது என்று நமது கவனத்துக்கு வருகிறது.

மாலை நேரத்தில் மொட்டை மாடியில் காலாற சிறிது நேரம் நடப்பது அவர் வழக்கம் என்று கேள்விப்பட்டிருந்தேன். அதனால் அன்று மாலை நானும் மொட்டை மாடிக்குச் சென்றேன். என்னைப் பார்த்த அவர் ஆச்சரியமடைந்து, “என்ன வாக்கிங்கா?” என்று பேச்சை ஆரம்பித்தார். சிறிது நேரம் பரஸ்பரம் குசலம் விசாரிப்புகள். அதற்குப் பின் நேரடியாக விஷயத்துக்கு வந்தேன்,

“நீங்கள் ஜோதிட சாஸ்திரம் அறிந்தவர் என்று கேள்விப் பட்டிருக்கிறேன். ராசியையும், லக்னத்தையும் எப்படி கண்டு பிடிப்பது என்று சொல்லுங்களேன்?” என்று கேட்டேன்.

“என்ன திடீரென்று ஜோதிடத்தைப் பற்றி விசாரிக்கிறீர்கள்?” என்றார்.

“சும்மா தெரிந்து கொள்ளலாம் என்றுதான்” என்றேன்.

“ஒருவர் பிறந்த பிறந்த நேரத்தையும், பிறந்த இடத்தையும் வைத்து, அந்த நேரத்தில் கிரகங்கள் எந்தெந்த அமைப்பில் இருக்கிறது என்று பஞ்சாங்கம் மூலமாகத் தெரிந்து, அவற்றைக் கருத்தில் எடுத்துக் கொண்டு, ஒரு சில கணக்குகளைப் போட்டு, ஒரு முடிவுக்கு வருவதுதான் ஜாதகம் கணித்தல் எனப்படுகிறது. அதில் சந்திரன் எந்த நட்சத்திரத்தில் இருக்கிறதோ அதுதான் அந்த ஜாதகரின் நட்சத்திரம். அது இடம் பெற்ற வீடுதான் அவரின் ராசி என்று சொல்லப்படும்” என்று சொல்லி சிறிது நிறுத்தினார்.

“சரிதான். புரிகிறது. லக்னம் என்றால் என்ன?”

“குழந்தை பிறந்த நேரத்தில் எந்த ராசி உதயமாகிறதோ, அதுதான் அந்தக் குழந்தையின் லக்னம் ஆகும்”

“அப்படியானால் ஒரே நேரத்தில் இருவர் வேறு வேறு இடங்களில் பிறந்தால் அவர்கள் ஜாதகம் மாறுபடும், சரிதானே” என்றேன்.

“ஆமாம், ஒரு சில நிமிட வித்தியாசம் கூட மிகப் பெரிய மாறுதலை ஏற்படுத்தும்” என்றார் உறுதியாக.

“சரி, ஒருவரைப் பார்த்தவுடன் அவர் என்ன ராசி, என்ன லக்னம் என்று சொல்ல முடியுமா?” என்று அடுத்த கேள்வியைக் வீசினேன். எனக்குத் தெரிய வேண்டியது அதுதானே.

“அது எப்படி முடியும்? அது சாத்தியமில்லையே” என்றார், என்னை சந்தேகமாகப் பார்த்துக் கொண்டே.

“ஆனால் ஒருவர் என்னைப் பார்த்தவுடனே என்னுடைய ராசி, லக்னம் எல்லாவற்றையும் சொன்னாரே” என்றேன்.

“அப்படியா, ஆச்சரியமாக இருக்கிறதே” இப்போது அவருக்கு ஓரளவுக்கு என்னுடைய நோக்கம் புரிந்திருக்கும் என்ற எண்ணம் ஏற்பட்டது.

“அது மட்டுமல்ல, அவர் என்னுடைய நட்சத்திரம் விசாகம் என்றும் அதிலும் 1ம் பாதம் என்றும் கூட சொன்னார்” என்றேன். அவர் என்னை நிமிர்ந்து பார்த்து, “இதை என்னால் நம்ப முடியவில்லையே” என்றார். அவர் முகத்தில் ஆச்சரியக்குறி!

“ஆனால் அதுதான் உண்மை. அவர் சொன்ன போது என்னால் நம்பவே முடியவில்லை” என்றேன்.

“அப்படியானால் அவர் ஒரு அதிசய மனிதர்தான். ஒரு சிலர் இப்படிப்பட்ட சக்தி உள்ளவர்களாக இருந்திருக்கிறார்கள். நானும் கேள்விப்பட்டிருக்கிறேன்” என்றார். கொஞ்ச நேரம் அமைதியாகக் கழிந்தது. பிறகு,

“ஜோதிடத்தைப் பற்றி ஓரளவு தெரிந்து கொள்ள வேண்டும் என்றால் எந்த புத்தகத்தைப் படிக்கலாம்?” என்று கேட்டேன்.

“குடும்ப ஜோதிடம் என்று ஒரு புத்தகம் இருக்கிறது. அதைப் படித்தால் ஓரளவு ஜோதிடத்தைப் பற்றித் தெரிந்து கொள்ளலாம்” என்றார்.

அவரிடம் பேசிய பிறகு, அந்த அதிசய மனிதரை உடனே சந்திக்க வேண்டும் என்ற எண்ணம் தீவிரமானது. ஆனால் அடுத்த பிரதோஷம் வரை காத்திருக்க வேண்டுமே. அன்று தானே அவரை சந்திக்க முடியும்.

அன்று மாலை புத்தக கடைக்குப் போய் பக்கத்து வீட்டு நண்பர் சொன்ன குடும்ப ஜோதிடம் புத்தகத்தை வாங்கி வந்து படிக்க ஆரம்பித்தேன்.

ஆனால் அதில் உள்ள விஷயங்களை புரிந்து கொள்வது மிகவும் கடினமாக இருந்தது. அதனால் நமது ராசி, லக்கினம் இவற்றுக்கு என்ன பலன் என்று முதலில் தெரிந்து கொள்ளலாம் என்று அதை மட்டும் படித்தேன்.

பின்பு நட்சத்திரங்களுக்கு உரிய பலன் என்ன என்பதைப் பார்த்தேன். விசாக நட்சத்திரம் 1, 2, 3, 4 என்று நான்கு பாதங்களுக்கும் பலன் அதில் சொல்லப் பட்டிருந்தது. எனக்கு விசாகம் முதல் பாதம் என்பதால் அதற்குரிய பலனைப் படித்தேன். படித்தவுடன் திகைத்து விட்டேன்.

அதில் இப்படி சொல்லப்பட்டிருந்தது.

visakham 

நன்றி: குடும்ப ஜோதிடம்

அதில் சொன்னபடி கல்வியில் ஆர்வம், சங்கீதத்தில் பிரியம் உள்ளவர் போன்ற விஷயங்கள் உண்மையென்றாலும், மற்றவர்களை ஏமாற்றும் குணம் கொண்டவர்களாகவும் இருப்பார்கள் என்பதையும் நடக்காத காரியங்களை சாதிக்க முயல்பவர்க்ளாக இருப்பார்கள் என்பதையும் என்னால் ஏற்றுக் கொள்ள முடியவில்லை.

ஜோதிட சாஸ்திரம் கூறுபவர்களாக இருப்பார்கள் என்பதைப் படித்த போது, அந்தப் பெரியவர் சொன்னது ஞாபகம் வந்தது. அவரைச் சந்திக்கும் போது நமக்குப் பொருந்தாத விஷயங்கள் சொல்லப் பட்டிருப்பதைப் பற்றி அவரிடம் கேட்க வேண்டும் என்று நினைத்துக் கொண்டேன்.

அடுத்த பிரதோஷம் நாளை மறுநாள் சனிக்கிழமை வருகிறது. என்னுடைய ஆவல் மிகவும் அதிகமானது.

அடுத்த இடுகையில் தொடரும்.

கவிஞர் கடிவேலு சோதிடரான கதை – பகுதி 2

4 டிசம்பர்

சென்ற இடுகையில் தான் சோதிடரானது எப்படி என்று கவிஞர் கடிவேலு சொல்ல ஆரம்பித்தாரல்லவா? நாம் மிகவும் ஆவலுடன் அந்தக் கதையைக் கேட்கத் தயாரானோம்.இதோ கவிஞரின் வார்த்தைகளிலேயே அந்தக் கதையைக் கேட்போம். அதற்கு முன்பு வெளியான கவிஞர் கடிவேலு சோதிடரான கதை – பகுதி 1 ஐ படிக்க இங்கே சொடுக்கவும்.

இதோ கவிஞர் கடிவேலு தொடர்கிறார்….

“ஒருமுறை என்னுடைய வியாபார விஷயமாக ஒரு நண்பரைப் பார்க்கப் போயிருந்தேன்.. அவருடைய வீட்டில் அமர்ந்து பேசிக்கொண்டிருந்த போது, அந்த வீட்டுக்குள்ளிருந்து ஒரு பெரியவர் வெளியே வந்தார். அவருக்கு சுமார் எழுபத்தி ஐந்து வயது இருக்கலாம். வந்தவர் கொஞ்ச நேரம் எங்களையே பார்த்துக் கொண்டிருந்தார். பிறகு திடீரென என்னைப் பார்த்து, “ஏம்ப்பா, உனக்குத் துலா ராசி தானே?” என்று கேட்டார். முன்பின் தெரியாத ஒருவர் திடீரென்று இப்படிக் கேட்டதும் எனக்கு தூக்கிவாரிப் போட்டது.

எனக்கு என்ன சொல்வது என்று தெரியாமல் உடனடியாக வார்த்தைகள் வரவில்லை. அதற்கு முன்னால் அவரை நான் பார்த்ததே இல்லை. என்னைப் பற்றி எந்த விபரமும் தெரிந்திருக்க வாய்ப்பில்லை. ஆனால் என்னைப் பார்த்ததுமே, ‘உனக்கு துலா ராசியா என்று கேட்கிறாரே’ அது எப்படி? என்று எனக்கு புரியவில்லை. கொஞ்சம் சுதாரித்துக் கொண்டு, சரி அவரிடமே கேட்கலாம் என்று, அவரைப் பார்த்து, “ஐயா, எப்படி…” என்று கேள்வியைக் கேட்டு முடிப்பதற்குள் “விசாகம் 1ம் பாதமா?, 2ம் பாதமா?” என்று அடுத்த கேள்வியை வீசினார். எனக்கு மேலும் அதிச்சி! ராசியைச் சொன்னார். அதற்காவது ஏதோ காரண காரியம் இருக்கும் என்று ஏற்றுக் கொள்ளலாம். ஆனால் குறிப்பாக ஒரு நட்சத்திரத்தைக் குறிப்பிட்டு அதிலும் 1ம் பாதமா, 2ம் பாதமா என்று கேட்கிறாரே? என்று அதிர்ச்சியில் உறைந்து விட்டேன்.

ஏனென்றால் அப்போது எனக்கு என்னுடைய நட்சத்திரம் மட்டுமே தெரியும். அதில் உள்ள பாதமெல்லாம் தெரியாது. பெரும்பாலானவர்களுக்கும் அப்படித்தானே, கோயிலில் அர்ச்சனை பண்ணும்போது அர்ச்சகர் கேட்டால் மட்டுமே ராசி நட்சத்திரம் சொல்கிறோம். மற்றபடி வேறு எதற்கும் பயன்படுத்துவதில்லை அல்லவா? அதனால், ‘ஐயா நான் துலா ராசிதான், விசாக நட்சத்திரம்தான். ஆனால் பாதம் பற்றி எல்லாம் தெரியாது’ என்றேன். அப்படியா என்று கேட்டு விட்டு, என்னை சிறிது நேரம் உற்றுப் பார்த்தார். “உனக்கு விசாகம் 1ம் பாதம்தான். லக்கினம் மிதுனம்” என்றார். அவர் குரலில் ஒரு உறுதி இருந்தது.

“ஐயா, எதை வைத்து இதையெல்லாம் சொல்கிறீர்கள்?” என்று கேட்டேன். உடனே ஏதோ ஜோக்கைக் கேட்டது போல் கடகடவென்று சிரிக்க ஆரம்பித்தார். எனக்கு ஒன்றுமே புரியவில்லை. என்ன சொல்லி விட்டேன் என்று இப்படி சிரிக்கிறார் என்று குழம்பியபடி என்னுடைய நண்பரைப் பார்த்தேன்.

“அப்பா, அவருக்குத்தான் ஒன்றுமே புரியவில்லை என்று சொல்கிறாரே, எப்படி என்று சொல்லேன்’ என்றார். அப்போதுதான் அவர் நண்பருடைய தந்தை என்று தெரிந்தது. அதைக் கேட்டதும் அந்தப் பெரியவர், “அடப் போடா, அவரே பெரிய ஜோதிடர்தானே” என்றார். எனக்கு திக்கென்றது. ‘நான் ஜோதிடனா?’ என்ன சொல்கிறார் இந்த மனிதர்? யார் இவர்? என்னென்னவோ சொல்கிறார் ஒன்றும் புரியவில்லையே’ என்று குழம்பிப் போனேன்.

அந்த மனிதர் வேறு எதுவும் சொல்லாமல் மறுபடி, வீட்டுக்குள் போய் விட்டார். எனக்கு என்ன செய்வது என்று தெரியவில்லை. அவருடைய மகனான என் நண்பரிடம் கேட்டேன். “என்ன இது? ஏதேதோ சொல்கிறாரே, கொஞ்சம் அவரிடம் கேட்டுச் சொல்லுங்கள்” என்றேன்.

“அவர் சாதாரணமாக யாரிடமும் பேச மாட்டார். இப்போது உள்ளே போய் கேட்பதில் எந்த பிரயோஜனமும் இல்லை” என்றார்.

“யாரிடமும் பேச மாட்டாரா? அப்படியானால் இப்போது எப்படி பேசினார்?” என்று கேட்டேன். “அதுதான் எனக்கும் புரியவில்லை. ரொம்பவும் அவசியமானால் மட்டுமே ஓரிரு வார்த்தைகள் பேசுவார். மற்றபடி வேறு யாரிடமும் பேச மாட்டார்” என்றார்.

தொடர்ந்து அவரே, “ஆனால் ஒவ்வொரு பிரதோஷத்தன்றும் விரதம் இருப்பார். அன்று முழுக்க யார் என்ன கேட்டாலும் தெளிவாகப் பதில் சொல்லுவார்” என்றார்.

எனக்கு கொஞ்சம் ஏமாற்றமாக இருந்தது. இதற்குக் காரணம் தெரியாமல் தலையே வெடித்து விடும்போல் இருந்தது. என்னைப் பார்த்த நண்பர், “ஒன்றும் கவலைப் படாதீர்கள்.  வரும் பிரதோஷத்தன்று காலையில் வாருங்கள். அப்போது உங்களுடைய கேள்விகளுக்கு விடை கிடைக்கும்’ என்று சொல்லி என்னை வழியனுப்பி வைத்தார்.

நான் வீட்டிற்குத் திரும்பிய பிறகும் எனக்கு அதே நினைவாகவே இருந்தது. எல்லாமே ஒரு அதிசயம் போல் நடந்து முடிந்து விட்டது. நான் பெரிய ஜோதிடனாமே! இதுவரையில் ஜோதிடத்தைப் பற்றி எனக்கு எதுவுமே தெரியாதே! அதுபற்றி நினைத்துக் கூடப் பார்த்ததில்லையே! நம்மைப் பார்த்தவுடன் துலா ராசியா என்று எப்படிக் கேட்டார். விசாக நட்சத்திரம் அதிலும் 1ம் பாதம் என்று சொன்னாரே, அது உண்மைதானா?

உடனே, அதைத் தெரிந்து கொள்ளலாம் என்று என்னுடைய ஜாதகத்தை எடுத்துப் பார்த்தேன்.

………………………………………………………………………………………………………………………………………………………………………………………………………………………………………………………………………………………………………………………………………………………………….

ஜென்ம நட்சத்திரம் விசாகம் ஆதியந்த பரம நாழிகை 64 வினாடி 26

கெர்ப்ப செல் நாழிகை 7 வினாடி 34 சுபம்

செல் நீக்கி நின்றது நாழிகை 56 வினாடி 52

புனர்பூசம்

விசாகம்

பூரட்டாதி

இம்மூன்று நட்சத்திரம் கொண்ட வியாழ மாகாதிசை வருஷம் 16

………………………………………………………………………………………………………………………………………………………………………………………………………………………………………………………………………………………………………………………………………………………………….

ஒன்றுமே புரியவில்லை. இதிலிருந்து பாதம் எப்படி தெரிந்து கொள்வது? அடுத்த பக்கத்தைப் புரட்டினேன். ஒவ்வொரு கிரகத்தின் நட்சத்திரமும் எந்த கிரகத்தின் சாரத்தில் என்று எழுதப்பட்டிருந்தது.

…………………………………………………………………………………………..

ராகுவின் சாரத்தில் லக்னம் திருவாதிரை 1ம் பாதம்

…………………………………………………………………………………………..

குருவின் சாரத்தில் சந்திரன் விசாகம் 1ம் பாதம்

………………………………………………………………………………………..

………………………………………………………………………………………..

………………………………………………………………………………………..

லக்னம் மிதுனம்

ராசி துலாம்

இதில் தான் விசாகம் 1ம் பாதம் என்று வருகிறது. அப்படியானால் இதுவாகத்தான் இருக்கும் என்று முடிவு செய்தேன். மிதுன லக்னம் என்றும் இருக்கிறது. 

அப்படியானால் அந்தப் பெரியவர் சொன்னது சரிதான்! நமக்கே இதைப் புரட்டிப் பார்த்தால்தான் தெரிகிறது. ஆனால் எதையுமே பார்க்காமல் அவர் எப்படி இதையெல்லாம் சொன்னார்? யோசிக்க யோசிக்க குழப்பம்தான் அதிகமானது.

என்ன செய்யலாம், யாரிடமாவது கேட்கலாமா? என்று யோசனை வந்தது.

அடுத்த இடுகையில் தொடரும்